ایران نے ہرمزگان میں اسرائیلی ڈرون مار گرایا، سخت ردعمل کی دھمکی
ایران کے صوبے ہرمزگان میں ایک مبینہ اسرائیلی جاسوس ڈرون کو فضائی دفاعی نظام نے نشانہ بنا کر مار گرایا ہے، ایرانی میڈیا نے دعویٰ کیا ہے کہ ڈرون ساحلی علاقے کے قریب پرواز کر رہا تھا۔
رپورٹس کے مطابق ایرانی فضائی دفاع نے فوری کارروائی کرتے ہوئے ڈرون کو تباہ کیا، تاہم اس حوالے سے آزاد ذرائع سے تصدیق نہیں ہو سکی۔
دوسری جانب پاسداران انقلاب کے سینئر کمانڈر بریگیڈیئر جنرل احمد وحیدی نے سخت ردعمل دیتے ہوئے کہا ہے کہ کسی بھی نئی جارحیت کا جواب علاقائی نہیں بلکہ تباہ کن اور فیصلہ کن ہوگا۔
انہوں نے کہا کہ دشمن ماضی میں بھی جنگ کے دوران پسپائی پر مجبور ہوا اور بالآخر جنگ بندی کی طرف گیا، جبکہ ایرانی مسلح افواج کی کارروائیوں اور عوامی حمایت نے دشمن کے منصوبے ناکام بنائے۔
جنرل وحیدی کے مطابق امریکہ اور اسرائیل کے خلاف حالیہ کشیدگی میں ایران نے برتری حاصل کی ہے، اور ملک کا اصل اثاثہ عوام کا اتحاد اور مزاحمتی جذبہ ہے۔
انہوں نے مزید کہا کہ ایران اپنی دفاعی صلاحیتوں پر کوئی سمجھوتہ نہیں کرے گا اور کسی بھی حملے کا بھرپور جواب دیا جائے گا۔
