ارجنٹینا نے ورلڈ کپ 2026 کیلئے 26 رکنی اسکواڈ کا اعلان کر دیا، لیونل میسی انجریز کے باوجود شامل
عالمی چیمپئن ارجنٹینا قومی فٹبال ٹیم نے فیفا ورلڈ کپ 2026 کیلئے اپنے 26 رکنی اسکواڈ کا اعلان کر دیا ہے، جس میں کپتان لیونل میسی بھی شامل ہیں۔
ارجنٹائن فٹبال ایسوسی ایشن کی جانب سے جاری کردہ اسکواڈ میں میسی سب سے نمایاں نام ہیں، جو اپنے شاندار کیریئر کا چھٹا ورلڈ کپ کھیلنے جا رہے ہیں۔ اسکواڈ میں شامل 17 کھلاڑی وہ بھی ہیں جو 2022 میں قطر میں عالمی ٹائٹل جیتنے والی ٹیم کا حصہ تھے۔
ورلڈ کپ سے قبل ارجنٹینا کو متعدد اہم کھلاڑیوں کی انجریز کا سامنا ہے۔ لیونل میسی حالیہ دنوں بائیں ہیم اسٹرنگ میں کھچاؤ اور تھکن کے باعث انٹر میامی کے ایک میچ کو مکمل نہیں کر سکے تھے۔
اسی طرح گول کیپر ایمیلیانو مارٹینیز بھی اسکواڈ میں شامل ہیں، حالانکہ گزشتہ ہفتے یوروپا لیگ فائنل کے دوران ان کے دائیں ہاتھ کی انگلی فریکچر ہو گئی تھی۔
ہیڈ کوچ لیونل اسکیلونی نے دفاعی کھلاڑی کرسٹیان رومیرو کو بھی ٹیم میں شامل کیا ہے، جو گھٹنے کی انجری سے صحت یاب ہو رہے ہیں۔ اس کے علاوہ نہویل مولینا اور گونزالو مونتیئل بھی اسکواڈ کا حصہ ہیں، حالانکہ دونوں حالیہ عرصے میں پٹھوں کی انجریز کا شکار رہے ہیں۔
فٹبال ماہرین کے مطابق انجریز کے باوجود ارجنٹینا اب بھی ورلڈ کپ کے مضبوط ترین امیدواروں میں شمار کیا جا رہا ہے۔
