معرکہ حق کا ایک سال مکمل، ملک بھرمیں جشنِ فتح کی تقاریب جاری
پشاور: معرکہ حق کی کامیابی کو ایک سال مکمل ہونے پر ملک بھر میں جشن فتح کی پروقار تقریبات کا سلسلہ جاری ہے جہاں وطن سے محبت اور قومی یکجہتی کا بھرپور اظہار کیا جا رہا ہے۔
اسی سلسلے میں اسلامیہ کالج پشاور میں پاک فوج اور کالج کے درمیان دوستانہ کرکٹ میچ کا انعقاد کیا گیا جسے اساتذہ اور طلبہ نے بھرپور جوش و خروش سے دیکھا۔
گراؤنڈ پاکستان زندہ باد کے نعروں سے گونج اٹھا اور کھلاڑیوں کی شاندار کارکردگی پر خوب داد دی گئی، تقریب کے اختتام پر مہمان خصوصی کی جانب سے نمایاں کارکردگی دکھانے والے کھلاڑیوں میں انعامات اور ٹرافیاں تقسیم کی گئیں۔
میچ کا مقصد معرکہ حق کی کامیابی کا جشن منانے کے ساتھ ساتھ طلبہ اور پاک فوج کے درمیان ہم آہنگی اور تعلق کو مزید مضبوط بنانا تھا۔
دوسری جانب پشاور کے مختلف تعلیمی اداروں میں بھی جشنِ فتح کی رنگا رنگ تقریبات منعقد ہوئیں جہاں ننھے طلبہ نے پاک فوج کے ہمراہ پرچم کشائی کی ملی نغمے پیش کئے اور خوبصورت ٹیبلوز کے ذریعے وطن سے محبت کا والہانہ اظہار کیا۔
تقاریب میں ملکی سلامتی اور استحکام کیلئے خصوصی دعائیں بھی کی گئیں جبکہ پاک فوج کی جانب سے بچوں کے جذبے کو سراہا گیا۔
طلبہ نے معرکہ حق کی کامیابی پر پاک فوج کو زبردست خراج تحسین پیش کرتے ہوئے پرجوش نعرے بھی لگائے۔
