نیو بلیو ایریا میں داخلے پر فیس لینے کا اقدام اسلام آباد ہائیکورٹ میں چیلنج

اسلام آباد کے نیو بلیو ایریا میں داخلے پر فیس لینے کا اقدام اسلام آباد ہائیکورٹ میں چیلنج کردیا گیا ہے ۔

میٹروپولیٹن کارپوریشن اسلام آباد کیخلاف دائر درخواست میں محمد طیب ایڈووکیٹ نے فیس کی وصولی کا اقدام غیر قانونی قرار دینے کی استدعا کی ہے ۔ درخواستگزار نے مؤقف اختیار کیا کہ نیو بلیو ایریا میں کمرشل مارکیٹس،کارپوریٹ ہیڈ کوارٹر اور ریسٹورنٹس ہیں ۔ ضلعی انتظامیہ سروس روڈ کے استعمال پر سو روپے فیس چارج کررہی ہے ۔ یہ پارکنگ نہیں بلکہ سروس روڈ استعمال کرنے کی فیس لی جارہی ہے ۔ اس چارج پر کوئی سہولت یا کوئی سروس نہیں دی جا رہی ۔ درخواستگزار کے مطابق داخلے کے لئے فیس چارج کرنا عدالتی فیصلوں کی بھی خلاف ورزی ہے ۔