ہم صرف خدا کے سامنے جھکتے ہیں، امریکی حکام خطے میں فوجی دھمکیوں کا سلسلہ بند کریں، ایرانی صدر
امریکا کی جانب سے ہتھیار ڈالنے کے مطالبے پر ایران کے صدر مسعود پزشکیان نے سخت ردعمل دیتے ہوئے واضح کیا ہے کہ ایران کسی بیرونی دباؤ کے سامنے سر نہیں جھکائے گا۔
عراقی وزیراعظم کے ساتھ گفتگو میں ایرانی صدر نے کہا کہ “ہم مسلمان پہلے ہی خدا کے سامنے سر جھکا چکے ہیں، اب کوئی اور ہمیں جھکا نہیں سکتا”، اور امریکی حکام پر زور دیا کہ وہ خطے میں فوجی دھمکیوں کا سلسلہ بند کریں۔
صدر پزشکیان نے اپنے ایک علیحدہ بیان میں عالمی سیاست پر تنقید کرتے ہوئے کہا کہ طاقت اگر اخلاقیات سے عاری ہو تو وہ کھوکھلی ہو جاتی ہے۔ ان کے مطابق موجودہ عالمی نظام میں افراتفری، جبر اور ناانصافی اس سوچ کا نتیجہ ہے جس میں سیاست کو صرف طاقت کے حصول تک محدود کر دیا گیا ہے۔
انہوں نے مزید کہا کہ ایران خود کو ایک “بااخلاق اور ذمہ دار طاقت” کے طور پر پیش کر رہا ہے، جبکہ اس کے مخالفین غیر ذمہ دارانہ اور بے لگام طرز عمل کی نمائندگی کر رہے ہیں۔
