پاکستان کے ایٹمی اثاثے جارحیت کے بجائے پاکستان کے دفاع کیلئے ہیں: وزیراعظم
وزیراعظم شہباز شریف نے واضح کردیا کہ پاکستان کے ایٹمی اثاثے جارحیت کے بجائے پاکستان کے دفاع کے لیے ہیں۔
وفاقی کابینہ کے اجلاس میں گفتگو کرتے ہوئے وزیرِ اعظم شہباز شریف نے کہا دنیا پاکستان کو ایک ذمہ دار ایٹمی قوت کے طور پر جانتی ہے، ایٹمی طاقت کے بعد پاکستان کو اب معاشی طاقت بنانا ہے اور ہر صورت میں چیلنجز کا مقابلہ کرنا ہے۔
وزیراعظم نے کہا ڈیڑھ ماہ کے دوران خطے میں جنگ کے بادل منڈلاتے رہے ، عارضی جنگ بندی کے باوجود دیگر ممالک کی طرح پاکستانی معیشت بھی متاثر ہوئی۔
وزیراعظم شہباز شریف نے کہا حکومت موجودہ حالات کا مقابلہ کررہی ہے، معرکہ حق میں قوم یک جان اور دو قالب تھی، وزیراعظم کا کہنا تھا افواج پاکستان نے دشمن کو وہ سبق سکھایا جو وہ رہتی دنیا تک یاد رکھے گا۔
اجلاس کے دوران اٹک میں خودش حملہ ناکام بنانے والے لیاقت شہید کو خراجِ تحسین بھی پیش کیا گیا ۔
