دکی میں کوئلہ کان حادثے کا ریسکیو آپریشن مکمل، 5 مزدوروں کو زندہ نکال لیا گیا، ایک کی لاش برآمد
بلوچستان کے ضلع دکی میں کوئلہ کان میں مٹی کا تودہ گرنے سے پھنسے مزدوروں کو نکالنے کے لیے ریسکیو آپریشن مکمل کر لیا گیا ، کان میں پھنسے 6 کان کنوں میں سے 5 کو زندہ نکال لیا گیا جبکہ ایک کی لاش برآمد ہوئی ہے۔
ڈسٹرکٹ انسپکٹر آف مائینز کے مطابق گزشتہ رات کوئلے کی کان میں مٹی کا تودہ گرنے سے 6 کان کن اندر پھنس گئے تھے۔
واقعے کی اطلاع ملتے ہی ریسکیو آپریشن شروع کیا گیا اور 14 گھنٹے کی مسلسل جدوجہد کے بعد ایک کان کن کو زندہ نکالا گیا۔ مزید ریسکیو ٹیمیں طلب کر کے آپریشن جاری رکھا گیا اور 20 گھنٹے بعد مزید 4 کان کنوں کو بھی بحفاظت نکال لیا گیا۔
حکام کے مطابق آپریشن کے آخری مراحل میں چھٹے کان کن کی لاش نکال لی گئی ہے جس کے بعد ریسکیو آپریشن مکمل ہو گیا ۔
یہ واقعہ اس وقت پیش آیا تھا جب کان کن 3 ہزار فٹ گہری کان میں کام کر رہے تھے۔
