کاہنہ میں ایک کروڑ 80 لاکھ روپے کی بڑی ڈکیتی کا حیران کن ڈراپ سین

پولیس کے مطابق ملزم عدیم پیشے کے لحاظ سے پراپرٹی ڈیلر ہے جس نے سرمایہ کاری میں ہونے والے نقصان کو پورا کرنے کے لیے یہ ڈکیتی خود منصوبہ بندی کے تحت کروائی۔ ابتدائی تفتیش میں انکشاف ہوا کہ ملزم نے اپنے ہی گھر کو نشانہ بنایا اور واردات کا ڈرامہ رچایا۔

پولیس کا کہنا ہے کہ دونوں بھائی ایک ہی گھر میں رہتے ہیں اور ملزم نے اپنے بھائی کی غیر موجودگی کا فائدہ اٹھاتے ہوئے یہ واردات کروائی۔ مزید یہ کہ ملزم کے بھائی کی پانچ ماہ قبل شادی ہوئی تھی اور ملزم کی نظر اپنی بھابھی کے زیورات پر تھی۔

تحقیقات کے دوران یہ بھی سامنے آیا کہ عدیم نے اپنے دفتر کے ملازمین کو واردات کے لیے آمادہ کیا اور گھر کی چابی خود فراہم کی، سی سی ٹی وی فوٹیج میں چابی فراہم کرنے کے مناظر سامنے آنے پر سارا بھانڈا پھوٹ گیا۔

سی سی ڈی کاہنہ پولیس نے کارروائی کرتے ہوئے مرکزی ملزم عدیم سمیت تین افراد کو حراست میں لے لیا جبکہ ملزمان کے قبضے سے سونا اور نقدی بھی برآمد کر لی گئی ہے۔ پولیس کے مطابق مزید تفتیش جاری ہے اور مزید انکشافات متوقع ہیں۔