وزیراعلی مریم نواز کی پنجاب بھر میں آپریشن کلین اپ کی براہ راست نگرانی
وزیراعلیٰ پنجاب مریم نواز کی ہدایت پر صوبے بھر میں عیدالاضحیٰ کے بعد آپریشن کلین اپ تیزی سے جاری ہے جبکہ وزیراعلیٰ خود صفائی آپریشن کی براہِ راست نگرانی کر رہی ہیں۔
حکومتی ذرائع کے مطابق ڈسٹرکٹ اور تحصیل سطح پر قائم مرکزی کنٹرول رومز کے ذریعے چوبیس گھنٹے مانیٹرنگ کی جا رہی ہے جبکہ سوشل میڈیا اور ہیلپ لائن پر موصول ہونے والی شکایات پر فوری کارروائی کا سلسلہ بھی جاری ہے۔
انتظامیہ کا کہنا ہے کہ آلائشوں کو فوری طور پر اٹھا کر محفوظ انداز میں ٹھکانے لگایا جا رہا ہے جبکہ گلی محلوں، بازاروں، چوراہوں اور اہم شاہراہوں کی سرف اور فینائل سے دھلائی بھی کی جا رہی ہے۔
قربان گاہوں میں عرقِ گلاب کا چھڑکاؤ اور چونے کا استعمال بھی کیا جا رہا ہے تاکہ تعفن اور آلودگی سے بچا جا سکے۔
لاہور، گوجرانوالہ، فیصل آباد، حافظ آباد اور سیالکوٹ سمیت مختلف شہروں میں صفائی آپریشن بلا تعطل جاری ہے۔
