لاہور کے سرکاری اسپتالوں میں فری ڈرائیونگ لائسنس فٹنس سرٹیفکیٹ کی سہولت فراہم کردی گئی
لاہور میں ڈرائیونگ لائسنس کے حصول کے لیے میڈیکل فٹنس سرٹیفکیٹ بنوانے والے شہریوں کے لیے بڑی سہولت فراہم کردی گئی،شہر کے سرکاری اسپتالوں میں فری میڈیکل فٹنس سرٹیفکیٹ سینٹرز قائم کر دیے گئے۔
چیف ٹریفک آفیسر لاہور کےمطابق شہری اب سرکاری اسپتالوں سے مفت میڈیکل فٹنس سرٹیفکیٹ حاصل کر سکیں گےابتدائی مرحلےمیں لاہور کے 13 سرکاری اسپتالوں میں فری ڈرائیونگ لائسنس فٹنس سرٹیفکیٹ سینٹرز قائم کیےگئے ہیں۔
ڈی ایچ کیومیاں میر اسپتال،ڈی ایچ کیو مزنگ،جنرل اسپتال غازی آباد اور تحصیل ہیڈ کوارٹرز اسپتال سبزہ زارمیں خصوصی میڈیکل کاؤنٹرز قائم کردیےگئے ہیں،اس کےعلاوہ گورنمنٹ اسپتال سمن آباد،قلعہ گجر سنگھ، شاہدرہ، بلال گنج، سوڈیوال، کاہنہ،رائیونڈ اور سوامی نگر بھی اس سہولت میں شامل ہیں۔
سی ٹی او لاہور کا کہنا ہے کہ کمرشل ڈرائیونگ لائسنس کے حصول اور پچاس سال سے زائد عمر کے افراد کے لیے میڈیکل فٹنس سرٹیفکیٹ لازمی ہے،جعلی میڈیکل سرٹیفکیٹس کی روک تھام کے لیے ڈیجیٹل نظام متعارف کرایا جا رہا ہےجبکہ آن لائن میڈیکل ویری فکیشن سے شفافیت، جوابدہی اور عوامی اعتماد میں اضافہ ہوگا۔
