خیبرپختونخوا کے اضلاع خیبر اور بنوں میں سیکیورٹی فورسز نے انٹیلی جنس بیسڈ کارروائیوں کے دوران فتنۃ الخوارج کے 13 دہشت گردوں کو ہلاک کردیا۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز کی جانب سے خیبرپختونخوا کے 2 علاقوں میں  کارروائیوں کے دوران بھارتی حمایت یافتہ 13 دہشت گرد ہلاک کردیئے گئے۔

ترجمان پاک فوج کے مطابق پہلی کارروائی ضلع خیبر کے علاقے باڑہ میں کی گئی، شدید فائرنگ کے تبادلے میں 10 خوارج ہلاک کردیئے گئے۔

خفیہ اطلاعات کی بنیاد پر دوسری کارروائی بنوں میں کی گئی، سیکیورٹی فورسز نے جھڑپ کے دوران 3 خوارج کو ٹھکانے لگایا، مزید دہشت گردوں کی تلاش کے لیے سینیٹائزیشن آپریشن جاری ہے۔

وزیراعظم نے 13 خارجیوں کو ہلاک کرنے پر سیکیورٹی فورسز کو خراج تحسین پیش کیا ہے۔ وزیراعظم نے کہا کہ سیکیورٹی فورسز نے اپنی پیشہ ورانہ مہارت سے بنوں اور باڑا میں دہشتگردوں کو جہنم رسید کیا، ملک کی حفاظت کے لیے سیکیورٹی فورسز دہشتگردی کے خلاف سیسہ پلائی دیوار کی مانند ہیں، حکومت پاکستان ملک سے دہشت گردی کے مکمل خاتمے کے لیے پر عزم ہے۔