آئی پی ایل میں اسمارٹ سن گلاسز پر پابندی، بی سی سی آئی کا سخت فیصلہ
بورڈ آف کنٹرول فار کرکٹ ان انڈیا نے انڈین پریمیئر لیگ میں اسمارٹ سن گلاسز کے استعمال پر پابندی عائد کر دی ہے۔ بھارتی میڈیا رپورٹس کے مطابق بی سی سی آئی کے اینٹی کرپشن یونٹ نے تمام فرنچائزز کو نئی ہدایات جاری کرتے ہوئے کھلاڑیوں اور میچ آفیشلز کو میچز کے دوران اسمارٹ سن گلاسز استعمال نہ کرنے کا حکم دیا ہے۔
رپورٹس کے مطابق بورڈ نے واضح کیا ہے کہ جدید اسمارٹ سن گلاسز میں کمیونیکیشن، لائیو اسٹریمنگ، میسجنگ اور ویڈیو کالنگ جیسے فیچرز موجود ہوتے ہیں، جو میچ کی سیکیورٹی اور اینٹی کرپشن قوانین کیلئے خطرہ بن سکتے ہیں۔
بھارتی میڈیا کے مطابق بی سی سی آئی نے خبردار کیا ہے کہ اس پابندی کی خلاف ورزی کرنے والوں کے خلاف سخت کارروائی کی جائے گی۔ اس فیصلے کو لیگ میں شفافیت برقرار رکھنے اور ممکنہ بدعنوانی کے خطرات کم کرنے کی کوشش قرار دیا جا رہا ہے۔
واضح رہے کہ اس سے قبل بھی بی سی سی آئی نے آئی پی ایل 2026 کے دوران کھلاڑیوں اور ٹیم آفیشلز کیلئے سخت ضابطہ اخلاق نافذ کیا تھا۔ بھارتی میڈیا کے مطابق بی سی سی آئی سیکریٹری دیواجیت سیکیا کی جانب سے تمام 10 فرنچائزز کو سات صفحات پر مشتمل خصوصی ہدایت نامہ جاری کیا گیا تھا۔
