امریکی وزیر خارجہ چار روزہ دورے پر بھارت پہنچ گئے، نریندر مودی سے اہم ملاقات آج ہوگی
امریکی وزیر خارجہ مارکو روبیو چار روزہ سرکاری دورے پر بھارت پہنچ گئے ہیں جہاں وہ نئی دہلی اور کولکتہ میں اہم سیاسی اور سفارتی ملاقاتیں کریں گے۔ ذرائع کے مطابق امریکی وزیر خارجہ آج بھارتی وزیر اعظم نریندر مودی سے ملاقات کریں گے جبکہ بھارتی وزیر خارجہ ایس جے شنکر کے ساتھ بھی تفصیلی مذاکرات متوقع ہیں۔
بھارتی ذرائع ابلاغ کے مطابق اس دورے کے دوران دونوں ممالک کے درمیان تجارت، دفاع، توانائی، علاقائی سلامتی اور چار ملکی اتحاد کے معاملات پر تفصیلی گفتگو کی جائے گی۔ دونوں ممالک باہمی تعلقات کو مزید مضبوط بنانے اور خطے کی بدلتی ہوئی صورتحال پر مشاورت کریں گے۔
رپورٹس کے مطابق مارکو روبیو کولکتہ میں اپنی مصروفیات مکمل کرنے کے بعد نئی دہلی روانہ ہوں گے جہاں اتوار کے روز بھارتی وزیر خارجہ کے ساتھ باضابطہ مذاکرات ہوں گے۔ اس کے علاوہ وہ بھارت کی میزبانی میں ہونے والے چار ملکی وزرائے خارجہ اجلاس میں بھی شرکت کریں گے۔
امریکی وزیر خارجہ کے دورے میں آگرہ اور جے پور کے دورے بھی شامل ہیں جہاں وہ مختلف ثقافتی اور سرکاری سرگرمیوں میں حصہ لیں گے۔
امریکی محکمہ خارجہ کی جانب سے جاری بیان میں کہا گیا ہے کہ اس دورے کے دوران توانائی کے تحفظ، تجارتی تعلقات، دفاعی تعاون اور خطے میں امن و استحکام سے متعلق امور پر خصوصی توجہ دی جائے گی۔
